मंगलवार, 5 अगस्त 2008

Priy Ramkrishna

Main ab bhi usi ki (Chhindwara)
galiyon-mohallon men
kahin ghoom raha hoon : Vishnu khare


Priy Ramkrishna,

Maine ab tak tumhara (mere bete se bhi chhote ho,isliye "tum" ke siwa kuchh aur likh nahin sakta) blog na to dekha tha na mujhe uska pata tha, lekin aaj surfing karte hue achanak vah mujhe dikha aur usmen mera ullekh bhi.

Mujhe yaad karne ke liye bahut dhanyavaad.

Mere aajaa Muralidhar Khare Chhindwara ki zila adaalat men naazir the aur mere pita Sunder Khare,(B.Sc. II Class,Nagpur University), Government High School men 1955 tak Science aur Mathematics ke shikshak the.

Hamara paitrik ghar Budhwari Mohalle ke chhote Ram Mandir ke paas jo chhota Hanuman Mandir hai uski chhendi men tha - ab use khareednewale ne ( hamne use nahin becha - vah ek alag qissa hai ) tudvakar ek naya makaan banva liya hai.

Mere bade bhai Shyam Khare, chhota bhai Gopal Khare aur swayam main Chhindwara ke Main Board Primary School aur Government High School men padhe hain - bade bhai saheb ne to 1953 men Chemistry aur Maths I men Distiction haasil karte hue Matric first division men pass kiya aur Air Force men jaane se pahle 16 varsh ki naabaaligh umr men Danielson School men mastery bhi ki.

1955 men bhautik roop se Chhindwara men rahna chhoot gaya lekin sthaayi roop se main ab bhi usi ki galiyon-mohallon men kahin ghoom raha hoon.

Yah sab isliye likha ki Dongre surname mujhe yaad hai, lekin vah Dongre mujhse/hamse kaise sambandhit the yah smaran nahi ho pa raha hai.

Sambhav hai tumhare pita ya ajoba se ham parichit rahe hon ya unmen se koi hamare saath padha ho.

Tumhare blog se hi maloom hua ki ab tum Dilli men ho. Kab se ? Kya kar rahe ho ?

Liladhar ne bhi kabhi zikr nahin kiya.

Filhaal main Mumbai men hoon - abhi kal hi Dilli se aya hoon. Kab lautoonga abhi kah nahin sakta.Lekin ichchha aur sambhavana ho to likhna.

Sasneh,

Vishnu Khare

कोई टिप्पणी नहीं: